Një hapësirë e tërë e Librarisë Dukagjini u nda për promovimin e librit “Ditari i Dhimbjes”.
Vet autorja, Diellza Jakupi, erdhi ndër të parat, duke u kujdesur që gjithçka të shkonte mirë, në prezantimin e veprës, të cilën ia ka kushtuar një personi shumë të veçantë.
“Libri është i dedikum për vëllain tim. unë e kam humbë vëllain nga një sëmundje e rëndë në vitin 2024”, ka thënë Diellza Jakupi, Autore e librit “Ditari i Dhimbjes”.
Pas pak, në Dukagjin, asnjë ulëse nuk mbeti e lirë. Të afërm të autores dhe pasionantë të librit, u bënë sy e veshë, për ta dëgjuar fillimisht dedikimin.
“Vëllait tim, që u bë dritë në qiellin tim, dhe shkëlqim i brendshëm në errësirë. Atij që më mësoi se dashuria nuk njeh ikje, se ajo nuk matet me kohë, dhe nuk shuhet në asnjë dimension”, ka thënë Diellza Jakupi, Autore e librit “Ditari i Dhimbjes”
Derisa emocionet kapluan të pranishmit, Diellza lexoi edhe poezinë e parë, të cilën e shkroi, pak pas humbjes së Arianit.
“Në një tjetër univers sot do të udhëtoj, me shpresë që ty do të të takoj. Më shumë se gjithçka tjetër, sot diçka dua: ti të më përqafosh mua. Të të përqafoj aq fort, sa yjet t’i shkundë, sa universin ta tundë”, ka thënë Diellza Jakupi, Autore e librit “Ditari i Dhimbjes”.
Megjithatë, Diellza thotë që dhimbjen e ktheu në forcë, bazuar në të cilën edhe e shkroi librin.
Mjetet financiare nga shitja e të cilit, do të shkojnë në një vend të veçantë.
“Duke e njoftë të gjithë ne shpirtin e Arianit, që ka dashtë t’i ndihmojë të gjithë. Dua që mjetet e mbledhura ti ndihmojnë njerëzit e prekur nga e njëjta sëmundje”, ka thënë Diellza Jakupi, Autore e librit “Ditari i Dhimbjes” .
Vepra që tashmë mund të gjendet në Librarinë Dukagjini, u vlerësua lart edhe nga recensentët dhe moderatorja.