Shtëpia Botuese “Dukagjini”, në bashkëpunim me Pearson, organizoi sot në Prishtinë konferencën “Together We Rise”, një nga ngjarjet më të rëndësishme profesionale për mësimdhënësit e gjuhës angleze në Kosovë.
Konferenca, mblodhi qindra mësimdhënës të gjuhës angleze.
Gjatë konferencës u trajtuan tema të rëndësishme si mësimdhënia në epokën e inteligjenca artificiale, dhe aftësitë që u nevojiten nxënësve për të ardhmen.
Një nga sesionet kryesore, “Learning for Life”, u udhëhoq nga eksperti i njohur i fushës së mësimdhënies së gjuhës angleze, Grant Kempton, i cili ka mbi 38 vjet përvojë në këtë sektor.
“Kjo konferencë ishte kryesisht një konferencë e udhëheqjes së mendimit, ku ndamë ide rreth asaj që po ndodh në botën e arsimit dhe se si mësuesit mund t’i zhvillojnë nxënësit e tyre për t’i përgatitur për punësim në të ardhmen. Qëllimi është që ata të jenë të gatshëm për tregun e punës, të gjejnë vende të mira pune dhe të përdorin gjuhën angleze për t’u shprehur në mënyrë efektive”, ka thënë Grant Kempton, Ekspert i mësimdhënies së gjuhës angleze.
Po ashtu, psikologia klinike Emirjeta Kumnova-Hoxha, udhëhoqi sesionin “Mirëqenia e mësuesve: Të kujdesemi për veten brenda mjedisit shkollor”.
“Së pari dua ta falënderoj shtëpinë Botuese Dukagjini që po i jep mjaft hapësirë mirqenies se mësimdhënësve, ne konsiderojmë se mirëqenia e mësimdhënësve nuk është vetëm një çështje individuale por duhet të jetë një çështje se i gjithë sistemi arsimor duhet ta trajtoj”, ka thënë Emirjeta Kumnova-Hoxha, Psikologe klinike.
Shtëpia Botuese “Dukagjini” theksoi se konferenca synon të krijojë hapësira për shkëmbimin e ideve, përvojave dhe praktikave më të mira në mësimdhënie.
“Ky ishte edicioni i 7të i Konferencës e cila organizohet nga Shtëpia Botuese Dukagjini në bashkëpunim me Shtëpinë Botuese Pearson ishte një konferencë e jashtzakonshme, një energji e jashtëzakonshme kishim qindra mësimdhënës sot këtu në sallë”, ka thënë Jeta Zymberi, Koordinatore e Shtëpisë Botuese “Dukagjini”.
Në përfundim të konferencës, u shpërblyen edhe mësimdhënësit fitues te thirrjes “Dukë Talks”, të cilët do të përfitojnë një udhëtim në Angli, përfshirë një program profesional plotësisht të financuar në konferencën IATFL 2027 në Mbretërinë e Bashkuar.
Gjithashtu, pjesëmarrësit u pajisën me certifikata.