Kryesuesi i Komisionit Qendror të Zgjedhjeve, Kreshnik Radoniqi, ka bërë të ditur se sonte do t’i japin rezultatet preliminare të zgjedhjeve të sotme parlamentare.
Radoniqi, mes tjerash, u shpreh se rreth orës 22:00 do të dalin me rezultate, njofton Dukagjini.
“Rezultatet preliminare do të dalin sonte. Unë besoj që diku rreth orës 21:30 apo 22:00 maksimum do të dalim me rezultat, por do t’ju njoftojmë paraprakisht. Nuk do ta caktojë tash orën”, deklaroi Radoniqi.
Kujtojmë se pas procesimit të 97,92% të vendvotimeve në nivel vendi, Komisioni Qendror i Zgjedhjeve ka bërë të ditur se në zgjedhjet e 7 qershorit kanë votuar 708,045 qytetarë, që përbën 36,13% të pjesëmarrjes.
Sipas të dhënave, numri i votuesve është rreth 200 mijë më i ulët krahasuar me zgjedhjet e 28 dhjetorit.
Në zgjedhjet e mëparshme, më 28 dhjetor, kishin votuar mbi 900 mijë qytetarë, ose 44,99% e votuesve me të drejtë vote.