Presidenti i SHBA-së, Donald Trump, ka kërcënuar se do të vendosë tarifa prej 100% ndaj importeve nga çdo vend evropian që vendos taksë për shërbimet digjitale të kompanive amerikane.
Në një postim në platformën Truth Social të premten, Trump tha se “shumë vende evropiane” po diskutojnë vendosjen e një takse të tillë ndaj kompanive amerikane dhe se “disa prej tyre janë pranë zbatimit të saj”, shkruan The Guardian, transmeton Dukagjini.
“Le të shërbejë ky deklarim si paralajmërim se çdo vend që vendos një taksë të tillë do të përballet menjëherë me një tarifë prej 100% për të gjitha mallrat që eksporton në Shtetet e Bashkuara të Amerikës”, shkroi Trump.
Ai shtoi se tarifa do të hynte në fuqi menjëherë dhe do të mbizotëronte mbi çdo marrëveshje tregtare ekzistuese me vendin përkatës.
Ky kërcënim mund të përshkallëzojë edhe më tej luftën tregtare të Trumpit, pasi ai ka vendosur tarifa të larta ndaj vendeve dhe blloqeve ekonomike në mbarë botën. Nëse kërcënimi zbatohet, ai mund të nxisë një konflikt më të gjerë tregtar mes SHBA-së dhe Bashkimit Evropian, nëse blloku me 27 shtete vendos të kundërpërgjigjet.
Franca, Spanja dhe Italia aktualisht aplikojnë një taksë prej 3% mbi shërbimet digjitale të kompanive të mëdha që operojnë në territoret e tyre, ndërsa disa vende të tjera të Bashkimit Evropian kanë miratuar ose propozuar masa të ngjashme.
Edhe Mbretëria e Bashkuar zbaton një taksë prej 2% për platformat e mediave sociale, motorët e mëdhenj të kërkimit dhe tregjet online që gjenerojnë të ardhura globale nga shërbimet digjitale mbi 500 milionë paund, të ardhura në Britani mbi 25 milionë paund dhe përfitojnë nga përdoruesit britanikë.
Kjo taksë prek kompani amerikane të teknologjisë si Apple, Google dhe Amazon, ndërsa sipas Thesarit britanik, gjatë periudhës 2024-2025 ka gjeneruar mbi 800 milionë paund të ardhura.
Një zëdhënës i Bashkimit Evropian deklaroi se blloku rezervon të drejtën të mbrojë interesat e tij përballë tarifave të tilla.
“Masat e njëanshme që synojnë politika të tilla legjitime janë të pajustifikuara. Nëse zbatohen, BE-ja do të reagojë shpejt dhe me vendosmëri për të mbrojtur të drejtat e saj dhe autonominë rregullatore”, tha Olof Gill, zëdhënës i Komisionit Evropian.
Ai theksoi se taksat mbi shërbimet digjitale nuk synojnë kompani të ndonjë vendi të caktuar, por zbatohen për të gjitha kompanitë e mëdha, pavarësisht origjinës së tyre.