Franca dhe Maroku do të përballen sonte, të enjten, nga ora 22:00, në çerekfinalen e Kupës së Botës 2026, në një duel që rikthen kujtimet e gjysmëfinales së Botërorit 2022.
Franca hyn në këtë sfidë si favorite për kualifikim, pasi ka zhvilluar një turne bindës deri më tani. “Les Bleus” fituan të tria ndeshjet e fazës së grupeve dhe eliminuan Suedinë me rezultat 3:0 në fazën e 1/16-ës. Në raundin pasues, francezët hasën më shumë vështirësi ndaj Paraguait, duke siguruar fitoren vetëm 1:0 falë një penalltie të realizuar në minutën e 70-të.
Në anën tjetër, Maroku vazhdon të jetë surpriza më e madhe e turneut dhe skuadra e vetme afrikane që ka mbetur në garë. Ata e nisën Botërorin me një barazim ndaj Brazilit, më pas mposhtën Skocinë dhe Haitin për të kaluar fazën e grupeve.
Në fazën me eliminim direkt eliminuan Holandën pas penalltive, ndërsa në 1/8 e finales triumfuan bindshëm 3:0 ndaj Kanadasë, pavarësisht se humbën herët nga lëndimi sulmuesin kryesor Ismael Saibari.
Përballja e sotme është edhe një mundësi për Marokun të hakmerret për humbjen 2:0 ndaj Francës në gjysmëfinalen e Kupës së Botës 2022, ndeshje në të cilën francezët kaluan në epërsi që në minutën e pestë dhe siguruan kualifikimin në finale.
Në pesë përballjet e tjera zyrtare mes dy kombëtareve, Franca ka bilanc pozitiv me tri fitore, një barazim dhe një humbje.
Fituesi i kësaj sfide do të sigurojë një vend në gjysmëfinalen e Kupës së Botës 2026.