Shtatë punonjës amerikanë të ndihmës humanitare, të cilët kanë qenë të angazhuar në luftën kundër shpërthimit të Ebolës në Republikën Demokratike të Kongos, janë vendosur në karantinë në një qendër të re izolimi në Kenia, pas kufizimeve të reja të udhëtimit të vendosura nga Shtetet e Bashkuara.
Lajmi është konfirmuar për Reuters nga Franklin Graham, president dhe drejtor ekzekutiv i organizatës humanitare Samaritan’s Purse, e cila punëson këta punonjës.
“Samaritan’s Purse ka shtatë anëtarë amerikanë të ekipit për reagim ndaj fatkeqësive. Asnjëri prej tyre nuk ka simptoma, por ata po mbahen në karantinë nga autoritetet keniane për 21 ditë”, ka deklaruar Graham.
Sipas politikës së re të Uashingtonit, qytetarët amerikanë që kthehen nga Republika Demokratike e Kongos, ku është shpërthyer Ebola, duhet të kalojnë tre javë në një vend të tretë përpara se të lejohen të hyjnë në SHBA, shkruan The Guardian, transmeton Dukagjini.
Për këtë qëllim, SHBA-ja po ndërton një qendër bioizolimi me 50 shtretër në një bazë ajrore në Kenian qendrore. Objekti është menduar për amerikanët që mund të jenë ekspozuar ndaj virusit në Republikën Demokratike të Kongos ose Ugandë, edhe nëse nuk shfaqin simptoma.
Ndërtimi i kësaj qendre ka shkaktuar reagime të forta në Kenia. Shumë qytetarë e kundërshtojnë projektin, duke e konsideruar atë si një mënyrë që SHBA-ja të transferojë rrezikun shëndetësor në territorin kenian.
Muajin e kaluar, ministri kenian i Shëndetësisë urdhëroi ndërprerjen e menjëhershme të punimeve, pasi u shpall në shpërfillje të vendimit të gjykatës që kishte pezulluar ndërtimin deri në një vendim përfundimtar. Megjithatë, sipas Reuters, punimet kanë vazhduar.
Një zyrtar i Departamentit Amerikan të Shtetit tha se grupi i amerikanëve ishte zhvendosur vullnetarisht në qendrën e izolimit në Kenia “si masë paraprake për monitorim dhe izolim”, ndërsa autoritetet keniane kanë autorizuar qëndrimin e tyre nën mbikëqyrjen e specialistëve amerikanë të shëndetit publik.
Sipas një burimi të njohur me çështjen, grupi mbërriti në objekt të hënën dhe po qëndron në tenda të pajisura me shtretër ushtarakë. Disa prej tyre kishin trajtuar pacientë me Ebola në qendrat e organizatës në Kongo, ndërsa të tjerët ishin angazhuar në punë mbështetëse, si ndërtimi i objekteve.
Burimi tha se ekziston të paktën një rast me ekspozim të mundshëm me rrezik të lartë ndaj virusit, ndërsa autoritetet keniane nuk i lejojnë anëtarët e grupit të largohen nga qendra gjatë periudhës së karantinës.
Ebola është një sëmundje virale shpesh fatale që transmetohet përmes kontaktit të drejtpërdrejtë me lëngjet trupore të personave ose kafshëve të infektuara.
Organizata Samaritan’s Purse është një nga organizatat më të mëdha humanitare të huaja që trajton pacientë me Ebola në Republikën Demokratike të Kongos dhe bashkëpunon ngushtë me Organizatën Botërore të Shëndetësisë për frenimin e shpërthimit të virusit.