Shefi i Grupit Parlamentar të AAK-së, Besnik Tahiri, ka propozuar që paga minimale të jetë 350 euro neto dhe jo 250 ashtu siç ka vendosur Qeveria, sepse sipas tij, është e pamjaftueshme.
Tahiri ka thënë se, në sektorin privat pagat janë më ta larta sesa 250 euro, dhe vendimi i Qeverisë nuk do të ndikonte te të punësuarit.
Po ashtu, Tahiri nuk la pa përmendur edhe kategorinë e veteranëve të luftës së UÇK-së, për të cilët tha se duhet të përfshihen në ligjin për pagën minimale. Ai, gjithashtu, tha se AAK-ja i përkrah të gjitha kërkesat që kanë veteranët, duke theksuar qëndrimin e partisë së tij, se edhe veteranët që janë të punësuar duhet t’i marrin pensionet.
Shefi i Grupit Parlamentar, e kritikoi Qeverinë e Kosovës, për të cilën tha se nuk po merr masa ndaj rritjes së çmimeve, sidomos të produkteve bazë.
Ai i ka propozuar Qeverisë, që ta ulë TVSH-në në produktet bazë, pasi kjo sipas tij, do të ndikonte direkt në jetën e qytetarëve.