Shtatë persona të dyshuar si pjesëtarë të rrjetit “Krasniqi”, me bazë në Ballkan, janë arrestuar ose janë dorëzuar te autoritetet kosovare pas vendosjes së sanksioneve financiare dhe të udhëtimit nga Mbretëria e Bashkuar.
Sipas të përditshmes britanike The Telegraph, rrjeti dyshohet se kishte zhvilluar një operacion të sofistikuar për falsifikimin e dokumenteve, duke prodhuar letërnjoftime, pasaporta dhe patentë-shoferë për migrantë që synonin të hynin ilegalisht në Mbretërinë e Bashkuar dhe vende të tjera.
Dokumentet e falsifikuara u mundësonin migrantëve të paraqiteshin si shtetas të më shumë se 50 vendeve, përfshirë Mbretërinë e Bashkuar. Sipas raportimeve, ato besohet se kanë ndihmuar mijëra migrantë të parregullt të udhëtojnë nëpër Evropë.
Foto nga aksioni i Policisë
Rënia e rrjetit erdhi pas sanksioneve të vendosura nga Britania e Madhe në kuadër të regjimit të saj për sanksionimin e personave të përfshirë në migrimin e parregullt.
Sipas autoriteteve britanike, disa prej të dyshuarve u dorëzuan vetëm pasi u vendosën në listën e sanksioneve.
Në mesin e shtatë personave të përfshirë në rast janë Flamur Krasniqi, Valon Krasniqi, Arif Krasniqi, Nexhmije Selmani, Shkembim Ermellahu, Sami Duriqi dhe Granit Avdyli.
Sipas autoriteteve, Flamur Krasniqi është gjetur në posedim të dokumenteve të falsifikuara, ndërsa Valon Krasniqi dyshohet se ka qenë i përfshirë në prodhimin e tyre.
Arif Krasniqi dyshohet se ka vepruar si ndërmjetës i grupit dhe se ka siguruar klientë për shërbimet e rrjetit.
Nexhmije Selmani akuzohet se ka siguruar hapësira të përdorura për falsifikimin e dokumenteve dhe se ka qenë e përfshirë në sigurimin e pajisjeve për falsifikim.
Shkembim Ermellahu dyshohet se është gjetur në posedim të dokumenteve të falsifikuara, ndërsa Sami Duriqi dyshohet se ka marrë pjesë në prodhimin e tyre.
Në anën tjetër, Granit Avdyli dyshohet se ka qenë i përfshirë në prodhimin e dokumenteve dhe në reklamimin e shërbimeve të grupit.
Sanksionet britanike ndikuan në dorëzimin e të dyshuarve
Sipas Ministrisë së Jashtme britanike, autoritetet kosovare vlerësojnë se është “shumë e mundshme” që sanksionet e Mbretërisë së Bashkuar të kenë pasur ndikim të rëndësishëm në vendimin e disa prej anëtarëve të rrjetit për t’u dorëzuar te Policia e Kosovës.
Të gjithë të dyshuarit ishin në kërkim përmes urdhërarresteve kombëtare dhe ndërkombëtare, ndërsa disa prej tyre u dorëzuan vetëm pasi Britania e Madhe i kishte sanksionuar.
Sanksionet i mundësojnë autoriteteve britanike ngrirjen e aseteve të personave të përfshirë, si dhe të individëve apo bizneseve që u ofrojnë atyre pajisje ose mbështetje financiare. Personat e sanksionuar gjithashtu ndalohen të udhëtojnë në Mbretërinë e Bashkuar.
Ministri britanik për Evropën, Lord Wood, tha se rrjeti kishte besuar se mund të vepronte në fshehtësi dhe të përfitonte nga dëshpërimi i njerëzve të cenueshëm.
“Rrjeti ‘Krasniqi’ mendonte se mund të fshihej në hije dhe të përfitonte pa u ndëshkuar nga dëshpërimi i njerëzve të cenueshëm – tani ata do të përballen me drejtësinë për veprimet e tyre”, tha Wood.
Ai e cilësoi bashkëpunimin mes Mbretërisë së Bashkuar dhe Kosovës si shembull të rëndësisë së bashkëpunimit ndërkombëtar në luftën kundër krimit të organizuar dhe migrimit të paligjshëm.
Britania e Madhe ka mbështetur Kosovën edhe përmes mentorimit të prokurorëve, gjyqtarëve dhe zyrtarëve policorë, si dhe përmes ekipeve të përbashkëta hetimore që synojnë luftimin e rrjeteve ndërkufitare të trafikimit të migrantëve.
Sipas të dhënave të cituara nga autoritetet britanike, më shumë se një e katërta e të gjitha kalimeve të paligjshme të kufirit në Bashkimin Evropian gjatë vitit 2023 janë regjistruar përmes rrugës së Ballkanit Perëndimor.