RTV Dukagjini ka shpalosur disa nga detajet rreth të dyshuarit për spiunazh, Fehim Sali, të cilit Gjykata i ka caktuar masën e paraburgimit prej 30 ditësh.
Sipas informacioneve të publikuara nga RTV Dukagjini, Fehim Sali ka pranuar fajësinë, përkatësisht rekrutimin e tij nga BIA serbe si agjent i saj, i cili ka vepruar që nga viti 2002.
Sipas Prokurorisë, Sali është serb nga Dragashi, i cili ka shtetësi të Kosovës dhe të Serbisë.
Ai, ndër të tjera, dyshohet se i ka ofruar BIA-s informacione për situatën politike në Kosovë.
Të gjitha këto, sipas informacioneve të RTV Dukagjinit, Sali i ka pranuar gjatë seancës për caktimin e masës së paraburgimit, e cila është mbajtur sot në Departamentin Special të Gjykatës Themelore në Prishtinë.
Sali kishte treguar në detaje veprimtarinë e tij inkriminuese, duke ofruar informacione për mënyrat dhe vendtakimet e komunikimit, si dhe për ofrimin e informacioneve për BIA-n serbe.
Sipas Prokurorisë, Sali dyshohet se, nga një datë e pacaktuar deri në arrestimin e tij, i ka ofruar BIA-s informacione për situatën politike në Kosovë.
RTV Dukagjini ka shfaqur edhe personin që dyshohet se e kishte rekrutuar Salin në BIA-n serbe. Ai është Zhelimir Matoviq, i cili mban pozitën e oficerit në BIA.
Sali dhe Matoviq kishin realizuar disa takime në Serbi.
Sali kishte siguruar vota nga Dragashi për partinë e Vuçiqit në Serbi. Ai kishte hartuar lista me votues potencialë të sigurt për SNS-në, si dhe kishte bërë identifikimin e personave që mund të mos votonin.
Informacionet e siguruara nga RTV Dukagjini brenda organeve të sigurisë tregojnë se Sali bënte identifikimin e zyrtarëve të AKI-së përmes fotografimit të tyre.
Po ashtu, ai dyshohet se siguronte informacione për persona të sektit vehabi dhe persona të tjerë, propozimin e tyre si objektiva të mundshme për rekrutim, krijimin e kontakteve me persona me ndikim në Serbi dhe Kosovë nga komuniteti joshumicë, si dhe informacione të tjera.