Bashkimi Evropian po shqyrton një formulë të re për përdorimin e aseteve të ngrira ruse në mbështetje të Ukrainës, ndërsa kundërshtimi i Belgjikës vazhdon të jetë një nga pengesat kryesore për arritjen e marrëveshjes.
Suedia, Holanda, Spanja dhe Polonia, të mbështetura edhe nga shtetet baltike, po shtyjnë përpara përpjekjet për t’i vënë asetet e palëvizshme të Bankës Qendrore të Rusisë në funksion të financimit të Ukrainës. Bëhet fjalë për rreth 210 miliardë euro, pjesa më e madhe e të cilave mbahet nga Euroclear me seli në Belgjikë.
Brukseli zyrtar belg vazhdon ta kundërshtojë një veprim të tillë për shkak të rreziqeve juridike dhe financiare. Ministri i Jashtëm belg, Maxime Prévot, ka paralajmëruar se përdorimi i aseteve në një mënyrë që mund të konsiderohet konfiskim do të sillte pasoja serioze. Euroclear tashmë përballet me një proces gjyqësor në Rusi.
Për të kapërcyer këtë ngërç, po diskutohet mundësia që asetet ruse të transferohen nga Euroclear te një kujdestar i ri, në pronësi dhe nën kontrollin e BE-së. Në këtë mënyrë, përgjegjësia nuk do të rëndonte vetëm mbi Belgjikën, por do të ndahej mes vendeve të Bashkimit Evropian.
Ministri ukrainas i Financave, Sergii Marchenko, e ka mbështetur këtë alternativë, duke argumentuar se kalimi i kujdestarisë nga Belgjika te BE-ja do të mund të zvogëlonte rreziqet dhe ta bënte çështjen përgjegjësi të përbashkët të 27 vendeve anëtare.
Një nga propozimet parashikon përdorimin e Nenit 122 të traktateve të BE-së për transferimin e aseteve te një kujdestar evropian. Sipas kësaj skeme, Banka Qendrore e Rusisë do të vazhdonte të konsiderohej pronare formale e parave dhe mund t’i rimerrte ato pasi Rusia të paguante reparacionet e luftës ndaj Ukrainës.
Në diskutim është edhe një alternativë tjetër: krijimi i një mekanizmi të posaçëm financiar që do t’i mbante të paprekura 210 miliardë eurot, por do të përdorte të ardhurat e krijuara prej tyre, rreth 4 miliardë euro në vit, për emetimin e obligacioneve dhe sigurimin e financimit shtesë për Kievin.
Megjithatë, shqetësimet mbeten të mëdha. Banka Qendrore Evropiane, Belgjika, Euroclear dhe disa vende anëtare druhen se një ndërhyrje e tillë mund të perceptohet ndërkombëtarisht si konfiskim i aseteve sovrane. Një precedent i tillë, sipas tyre, mund të nxisë investitorët dhe shtetet e tjera të largojnë rezervat nga eurozona, duke dëmtuar reputacionin dhe stabilitetin financiar të euros.
Për momentin, mbetet e paqartë nëse kalimi i aseteve te një kujdestar i përbashkët i BE-së do të jetë i mjaftueshëm për të bindur Belgjikën dhe për t’i dhënë fund bllokimit të gjatë politik.