Gana ka konfirmuar dy rastet e para me virusin vdekjeprurës Marburg, një sëmundje shumë infektive në të njëjtën familje me virusin Ebola.
Dy pacientë vdiqën së fundmi në spital në rajonin jugor të Ashantit, raporton BBC.
Mostrat e tyre dolën pozitive në fillim të këtij muaji dhe tani janë verifikuar nga një laborator në Senegal.
Zyrtarët shëndetësorë në vendin e Afrikës Perëndimore kanë raportuar se, gjithsej, 98 persona janë tani në karantinë si raste të dyshuara kontakti.
Nuk ekziston ende asnjë trajtim për Marburg, por mjekët thonë se pirja e ujit në masë të madhe dhe trajtimi i simptomave specifike përmirëson shanset e pacientit për të mbijetuar.
Virusi transmetohet te njerëzit nga lakuriqët e natës dhe përhapet midis njerëzve përmes transmetimit të lëngjeve trupore.
Është një sëmundje e rëndë, shpesh fatale. Simptoma të këtij virusi janë dhimbje koke, ethe, dhimbje muskulore, të vjella me gjak dhe gjakderdhje.
Zyrtarët po paralajmërojnë njerëzit që të qëndrojnë larg shpellave dhe të gatuajnë tërësisht të gjitha produktet e mishit përpara se t’i konsumojnë ato.
Në Afrikë, shpërthime të mëparshme dhe raste sporadike me Marburg janë raportuar në Angola, Kongo, Kenia, Afrikë Jugore dhe Ugandë, raporton OBSH.
Shpërthimi i parë i Marburgut ishte në Gjermani në vitin 1967, ku vdiqën shtatë persona.