Personat që e sulmojnë Policinë e Kosovës në veri janë të njohur si individë të kyçur në aktivitete ilegale, thotë ministri i Punëve të Brendshme të Kosovës, Xhelal Sveçla.
Sipas tij, këto grupe janë të kontrabandistëve dhe janë të koordinuara ngushtë nga institucionet e Serbisë.
Serbia i shfrytëzon këto grupe për të minuar autoritetin e Kosovës në veri të vendit.
Sveçla për Radio Evropa e Lirë ka thënë se Millan Radoiçiq është njëri ndër krerët e këtyre strukturave, dhe ai është në arrati nga organet e Kosovës për rastin “Brezovica”.
Po ashtu, Radoiçiq është edhe në listën e zezë të Shteteve të Bashkuara të Amerikës dhe dyshohet se së bashku me Zvonko Veselinoviq, biznesmenin nga veriu i Kosovës, dhe shumë serbë të tjerë, i përkasin një rrjeti të lidhur me krimin e organizuar ndërkombëtar.
Sveçla për sulmin e policëve në veri thotë se është e qartë që kriminelët në veri janë të pakënaqur me gjendjen aktuale atje.
“Tendenca e tyre për të vazhduar me të njëjtat metoda, me të njëjtat qasje në raport me ligjin, patjetër që janë duke u luftuar në vazhdimësi nga strukturat e sigurisë të Republikës së Kosovës”.
“Dy prej sulmuesve janë arrestuar. Fatkeqësisht, prokurorja kujdestare e Prokurorisë Themelore, atë natë e ka liruar njërin nga ta në procedurë të rregullt, çuditërisht. Por, njëri është në paraburgim. Janë persona të njohur për strukturat e sigurisë dhe tashmë ligji është duke u marrë me ta”, ka thënë Sveçla për sulmuesit.
Ministri i Punëve të Brendshme ka thënë se janë duke hetuar me të gjitha kapacitetet e tyre, për sulmet e mëhershme.
Në këto hetime është i përfshirë dhe Millan Radoiçiq, i cili është i arratisur në territorin e Serbisë.
Sa i përket sistemit të drejtësisë sa i takon zbatimit të ligjit, Sveçla thotë se ka ngecje të theksuara.
“Megjithatë, tash situata ka ndryshuar rrënjësisht. Ministria e Punëve të Brendshme, me të gjitha agjencitë e saj, me të gjithë mekanizmat e saj, duke bashkëpunuar ngushtë edhe me të gjithë mekanizmat e tjerë qeveritarë, do të bëjë maksimumin që të gjitha këto dukuri të luftohen, të dokumentohen dhe pastaj ky maksimum i yni do t’i vërë në pozita jashtëzakonisht të palakmueshme të gjithë të tjerët, të cilët synojnë amortizimin, anashkalimin e krimeve dhe kriminelëve” ka thënë ai.