Gjykata Kushtetuese e Kosovës po shënon 17-vjetorin e themelimit me një konferencë ndërkombëtare, ku në fokus është roli i drejtësisë kushtetuese në mbrojtjen e demokracisë, të drejtave themelore dhe funksionimit demokratik të institucioneve.
Në këtë aktivitet po merr pjesë edhe presidentja e Kosovës, Justina Shiroka-Pula, e cila theksoi rëndësinë e pavarësisë së Gjykatës Kushtetuese dhe respektimit të Kushtetutës nga të gjitha institucionet e vendit.
Ajo tha se Kushtetuta garanton që askush të mos jetë mbi ligjin dhe që pushteti të ushtrohet me përgjegjësi, duke mbrojtur të drejtat dhe liritë e qytetarëve.
Sipas saj, pavarësia e Gjykatës Kushtetuese nuk është vetëm parim juridik, por garanci themelore për demokracinë, sundimin e ligjit dhe besimin e qytetarëve në institucione. Ajo theksoi se ky mision bëhet edhe më i rëndësishëm në kohë krizash politike, kur vihet në sprovë respektimi i parimeve kushtetuese.
Ndërkaq, kryetari i Gjykatës Kushtetuese, Nexhmi Rexhepi, tha se institucioni ka vendosur standarde të qëndrueshme në mbrojtje të identitetit kushtetues, duke garantuar respektimin e sundimit të ligjit, demokracisë dhe parimeve të modelit liberal.
Kjo Konference synon të theksojë rëndësinë e drejtësisë kushtetuese në garantimin e epërsisë së Kushtetutës, mbrojtjen e të drejtave të qytetarëve dhe ruajtjen e ekuilibrit ndërmjet institucioneve shtetërore.