Anëtari i Aleancës, Daut Haradinaj, u ka bërë thirrje shqiptarëve në Luginën e Preshevës që të dielën të marrin pjesë në zgjedhje dhe të votojnë për “Koalicionin Shqiptar”, me numrin 17.
Përmes një video-mesazhi drejtuar shqiptarëve të Luginës, Haradinaj ka theksuar rëndësinë e pjesëmarrjes në votime, duke e cilësuar si një mundësi historike për përfaqësim më të madh të shqiptarëve në Parlamentin e Serbisë.
Ai ka bërë thirrje për unitet, duke vlerësuar se bashkimi në një listë të përbashkët duhet të reflektohet edhe në vendvotime.
“Jeni bashkuar në një listë të përbashkët dhe të bashkuar duhet të jeni edhe në vendvotime”, ka shkruar Haradinaj.
Ai u ka kërkuar shqiptarëve që ta shfrytëzojnë të drejtën e votës për të kontribuar në mbrojtjen e të drejtave të shqiptarëve në Luginën e Preshevës.