Pjesëtarë të komunitetit RAE dhe qytetarë serbë nga Kosova kanë deklaruar për KosovaPress, në kushte anonimiteti, se po përballen me presione dhe kushtëzime për të votuar për Partinë Përparimtare Serbe (SNS) të presidentit serb, Aleksandar Vuçiq, në zgjedhjet në Serbi.
Sipas burimeve anonime nga Plemetini, po organizohet transport i paguar drejt Serbisë. Sipas një qytetari, një autobus që kishte transportuar një grup të këtij komuniteti është kthyer sërish për të marrë grupin e dytë.
I njëjti ka deklaruar se po u mbulohen shpenzimet e udhëtimit dhe u premtohen nga 100 euro për votimin për SNS-në, me pagesën që, sipas pretendimeve, bëhet pasi të përfundojë votimi.
KosovaPress mëson nga burimet brenda institucioneve të sigurisë se ka raste kur serbët që jetojnë në Kosovë po kushtëzohen me ndihmat që marrin, ndërsa ndaj tyre po ushtrohen presione dhe shantazhe për të votuar për partinë e Vuçiqit.
“Paratë për këto pagesa janë siguruar nga Milan Radoiçiq. Mesazhet kërcënuese, presionet dhe shantazhet ndaj votuesve në Kosovë po përcillen nga struktura ilegale serbe dhe përfaqësues të Listës Serbe”. Sipas të njëjtit, këto struktura po thirren në emër të terroristit Milan Radoiçiq dhe të së ashtuquajturës, Zyrë për Kosovën në Qeverinë e Serbisë.
Burimet bëjnë të ditur se në organizimin e procesit në Serbi dhe në zonën kufitare janë përfshirë pjesëtarë të grupit të lidhur me të, të cilit i referohen si “MC”.
Mësohet po ashtu se votuesit janë udhëzuar se si të votojnë dhe u është thënë se ekzistojnë mekanizma për të verifikuar nëse ata kanë votuar për SNS-në.
Kujtojmë se më herët janë ngritur shqetësime për regjistrin e votuesve të Serbisë. Burimet konfirmojnë se ka një rritje prej më shumë se 20 mijë personash të regjistruar si votues nga Kosova.
Krejt këto, sipas burimeve, po shfrytëzohen nga presidenti serb Aleksandar Vuçiq për të mobilizuar votuesit nga Kosova në mbështetje të SNS-së, në një kohë kur në Serbi është zhvilluar lëvizja studentore që kërkon ndryshime politike.