Të hënën e 1 gushtit, Kryeministri i Shqipërisë dhe ai i Spanjës kanë mbajtur një konferencë të përbashkët për shtyp.
Kryeministri shqiptar është pyetur edhe për ngjarjet e djeshme në veri të Kosovës, dhe nëse këto ngjarje, janë arsyeja se pse Kosova nuk duhet të jetë pjesë e Ballkanit të Hapur.
“Ngjarja e djeshme është pasqyrë e vështirësisë së thellë që ka në këtë marrëdhënie dhe ushtrimi i sovranitetit në të gjithë territorin e shtetit të Kosovës bazuar në marrëveshjen e Brukselit është një detyrë e Republikës së Kosovës”, tha kryeministri i Shqipërisë, Edi Rama.
Rama ka shtuar se e mbështet Kosovën dhe kërkesën e saj për zbatimin e marrëveshjes dhe i përgëzon autoritetet e Kosovës për sensin e vetëpërmbajtjes dhe dëgjimin e aleatëve që sugjeruan shtyrjen për 30 ditë.
“Këto situata nuk tregojnë se Ballkani i Hapur është i panevojshëm apo i gabuar, por këto situata tregojnë se pse kemi nevojë për këtë. Këto situata tregojnë se pse duhet Ballkani i Hapur dhe pse Kosova duhet të vijë të ulet në tryezën e Ballkanit të Hapur”.
Sipas Ramës, këto situata kanë dy rrugë, luftën ose ndërtimin e paqes.
“Ne duhet të punojmë për të ndërtuar rrugë ndërveprimesh që na japin mundësinë të kuptojmë që nuk jemi dy palë qënie, por jemi të gjithë njerëz dhe kemi detyrimin që fëmijëve tanë t’iu lëmë një hapësirë paqeje e jo një zonë të mbledhur me mina që shpërthejnë për lloj-lloj arsyesh”, u shpreh Rama.
Ndërsa, kryeministri spanjoll për njohjen e Kosovës si shtet të pavarur ka thënë se krahas miqësisë me Shqipërinë, Spanja mendon se një deklaratë e njëanshme e pavarësisë është shkelje e të drejtave ndërkombëtare, prandaj nuk mund të jenë në favor të këtij pranimi.
Edi Rama: I bëj thirrje Vuçiqit të mos ushqejë grupet e caktuara në veriun e Kosovës