Ushtria izraelite ka ndërmarrë një sulm masiv në Rripin e Gazës në përgjigje të kërcënimeve nga një grup militant palestinez atje, raporton BBC.
Një udhëheqës i Xhihadit Islamik Palestinez është vrarë, sipas autoriteteve izraelite.
Taysir al-Jabari, një komandant i Brigadave Al-Quds, krahu ushtarak i Xhihadit Islamik, ka vdekur në një sulm ajror në një apartament në Kullën Palestine në qendër të qytetit të Gazës, raporton Al Jazeera.
Kjo pason disa ditë tensionesh pasi Izraeli arrestoi një anëtar të lartë të PIJ-së, një nga grupet kryesore militante në Gaza.
PIJ me bazë në Gaza kishte kërcënuar se do të hakmerrej, duke përfshirë bombardimin e qendrës së Izraelit.
Pak para fillimit të operacionit, ministri izraelit i mbrojtjes Benny Gantz lëshoi një paralajmërim, duke thënë: “Për armiqtë tanë, dhe veçanërisht për udhëheqjen e [sundimtarëve të Gazës] Hamas dhe Xhihadit Islamik Palestinez, do të doja të theksoja: koha juaj ka mbaruar. Kërcënimi [për këtë rajon] do të hiqet në një mënyrë ose në një tjetër.”
