Pak ditë pas intervistës së tij për mediumin La Republica ku e kishte përmendur mundësinë e një konflikti të ri me Serbinë, kryeministri i Kosovës, Albin Kurti e ka ripërsëritur këtë gjë tash për agjencinë ndërkombëtare të lajmeve Reuters.
Në një intervistë për ta, kryeministri i Kosovës, ka thënë se Kosova është e përgatitur të mbrohet kundër një sulmi të mundshëm nga Serbia.
“Kosova është e përgatitur të qëndrojë kundër një sulmi të mundshëm nga Serbia, pasi përkeqësimi i grindjeve me komunitetin serb mund të rezultojë në një konflikt të ri të armatosur”, ka thënë Kurti për Reuters.
“Nuk po them se do të na sulmojnë këtë javë ose në vijim, por do të ishte krejtësisht e papërgjegjshme të përjashtohej…mundësia e rritjes së tensioneve dhe konflikteve të reja”, ka vijuar kryeministri i Kosovës.
Kryeministri i Kosovës për Reuters tha se Kosova tashmë është shtet dhe i ka organet e sigurisë dhe mbrojtjes e që në të kaluarën nuk i kishte.
“Ne kemi institucionet dhe organet tona të sigurisë dhe mbrojtjes, Kosova tani është shtet, nuk është viti 1998”, tha Kurti.
“Ky është viti 2022, kështu që ne jemi shumë më të përgatitur për të mbrojtur sovranitetin tonë, integritetin territorial, për të mbrojtur demokracinë tonë, sundimin e ligjit, kushtetutshmërinë dhe për të mbrojtur progresin tonë”, shtoi ai.
Po ashtu, Kurti foli edhe për presidentin e Rusisë, Vladimir Putin, për të cilin tha se ka për qëllim ta përhapë luftën.
“Presidenti despotik (rus) (Vladimir) Putin është një njeri i luftës dhe ai do të kishte interes për të përhapur luftën, sepse ai dëshiron të normalizojë luftën,” tha Kurti, duke aluduar për pushtimin e Rusisë në Ukrainën fqinje në shkurt.
Kryeministri i Kosovës Albin Kurti dhe presidenti serb Aleksandër Vuçiq pritet të takohen në Bruksel për bisedime më 18 gusht.
Agjenda dhe temat e diskutimit nuk janë bërë të ditura deri më tani.
Kurti për gazetën italiane: Ekziston rreziku për konflikt, pas Serbisë është Putini