Kryetari i komunës së Mitrovicës, Bedri Hamza të premten i ka vizituar ish-krerët e Ushtrisë Çlirimtare të Kosovës (UÇK), në qendrën e paraburgimit në Hagë.
Hamza ka bërë të ditur se e ka vizituar Hashim Thaçin, Kadri Veselin, Rexhep Selimin dhe Hysni Gucatin.
Sipas kryetarit të Mitrovicës, të “gjithë ushtarët e lirisë ishin mirë”.
“Lufta mbrojtëse e popullit të Kosovës ishte e drejtë dhe e pastër andaj kurrë më krenarë se sot nuk i pashë edhe në këtë betejë të tyre. Me besimin e pa thyer që shumë shpejt do të jenë pranë nesh, të lirë siç u takon, u çmallëm e folëm gjerë e gjatë për Kosovën që aq shumë e duan”, ka shkruar në Facebook Hamza.
Ish-krerët e UÇK-së, po akuzohen nga Gjykata e Hagës se kanë kryer krime lufte në luftën e fundit në Kosovë.