Të mërkurën e 17 gushtit, Kompania Kosovare për Distribuim me Energji Elektrike (KEDS), ka bërë thirrje që të kursehet energjia elektrike.
“Ky është një shembull se si duhet të duken të gjitha objektet në të cilat nuk punohet gjatë natës”, thuhet në postimin e kësaj kompanie në Facebook.
Sipas njofimit të KEDS-it, çdo dritë e fikur luan rol të madh, prandaj çdo kilovat i kursyer mundëson që të gjithë të kenë më shumë energji elektrike atëherë kur nevojitet më së shumti.
Ndryshe, më 14 gusht, KEDS-i ka njoftuar se ka pranuar urdhëresë nga Qendra Nacionale Dispecerike e Kosovës, pjesë e KOSTT-it, që të fillojë me kufizimet e energjisë elektrike.
Tutje në pasditen e së hënës, Ministria e Ekonomisë ka bërë të ditur se është kthyer furnizimi i rregullt me energji elektrike.
Nga ministria ishte thënë se kjo është arritur falë bashkëpunimit mes Kosovës dhe Shqipërisë.