Ambasadori i Kosovës në Bruksel, Agron Bajrami, ka rikujtuar vendimin e Gjykatës Ndërkombëtare të Drejtësisë (GJND). Kosova para 12 vjetësh në GJND e kishte fituar rastin pasi kjo gjykatë kishte dalë me vendimin se shpallja e njëanshme e Pavarësisë së Kosovës nuk ishte në kundërshtim me ligjin ndërkombëtar.
“Veçanërisht kjo e diel duket si ditë e mirë për ta kujtuar se Deklarata e Pavarësisë së Kosovës nuk ishte në kundërshtim me të Drejtën Ndërkombëtare dhe ndonjë rezolutë të Këshillit të Sigurimit të Kombeve të Bashkuara”, ka shkruar Bajrami në Twitter.
Time to retweet this reminder… https://t.co/gGFpleQpuW
— Agron Bajrami (@AgronBajrami) August 2, 2022
Asambleja e Përgjithshme e Kombeve të Bashkuara kishte kërkuar nga GJND-ja një opinion lidhur me Shpalljen e Pavarësisë së Kosovës më 17 shkurt të vitit 2008.
Kjo çështje kishte kaluar në votim në mes të gjyqtarëve të GJND-së, ku në favor të Kosovës kishin votuar gjyqtarët, Hisashi Owada nga Japonia, presidenti i GJND-së Thomas Burgenthal nga ShBA-ja, Christopher Greenwood nga Britania e Madhe, Ronny Abraham nga Franca, Bruno Simma nga Gjermania, Kenneth Keith nga Zelanda e Re, Awn Shawkat Al-Khasawneh nga Jordania, Antonio A. Cançado Trindade nga Brazili, Abdulqawi Ahmed Yusuf nga Somalia, Bernardo Sepulveda- Amor nga Meksika.
Këto ishin 10 votat pro që Kosova nuk e kishte shkelur të Drejtën Ndërkombëtare me shpalljen e njëanshme të pavarësisë.
Por, kishte edhe nga ata që mendonin ndryshe dhe votuan kundër. Gjyqtarët që kanë votuar kundër Kosovës ishin, Peter Tomka- nënpresident, përfaqësues nga Sllovakia, Leonid Skotnikov nga Rusia, Abdul G. Koroma nga Sierra Leone, Mohamed Bennouna nga Maroku.