Të mërkurën e 24 gushtit, kryeministri i Kosovës, Albin Kurti, ka pritur në takim të dërguarin e posaçëm të Shteteve të Bashkuara për Ballkanin Perëndimor, Gabriel Escobar, dhe përfaqësuesin e Bashkimit Evropian për dialogun Kosovë-Serbi, Miroslav Lajçak.
Në ndërtesën e Qeverisë është parë duke hyrë edhe komandanti i KFOR-it, Ferenc Kajari dhe Ministri i Punëve të Brendshme, Xhelal Sveçla.
Pas takimit njëorësh të mbajtur me presidenten Vjosa Osmani, ata priten të diskutojnë edhe me kreun e Qeverisë lidhur me dialogun Kosovë-Serbi dhe dy vendimet e Qeverisë për targa dhe letërnjoftime.
Lajçak pritet të takohet edhe me liderët e partive opozitare, ndërsa Escobar ishte takuar me liderët e opozitës të martën mbrëma.
Qëllimi i vizitës së dy emisarëve është që të bisedojnë me palët për arritjen e një marrëveshjeje të mundshme, përpara një shtatorit.
Ndonëse ka mbetur edhe një javë kohë deri më një shtator, kur Qeveria e Kosovës do të nisë zbatimin e vendimeve për riregjistrim të automjeteve me targa serbe në RKS dhe lëshimin e dokumenteve hyrëse-dalëse për shtetasit serbë, tashmë veçse kanë filluar përpjekjet ndërkombëtare për të gjetur një zgjidhje.
Pas këtyre takimeve, të enjten dy emisarët pritet të vizitojnë edhe pjesën veriore të vendit.