Të enjten e 1 shtatorit, ashtu siç është paraparë, ka filluar zbatimi i marrëveshjes për lëvizje të lirë ndërmjet Kosovës dhe Serbisë.
Ministri i Punëve të Brendshme të Kosovës, Xhelal Sveçla, të mërkurën në pikën kufitare në Bërnjak ka bërë të ditur se është ndërprerë lëshimi i dokumenteve për hyrje-dalje nga autoritetet e Serbisë për shtetasit e Kosovës.
Ndërkaq në lidhje me sigurinë dhe stabilitetin në vend, KFOR-i ka thënë se mandati i tyre sipas rezolutës 1244 të vitit 1999 të Këshillit të Sigurimit të Kombeve të Bashkuara, është që t’u sigurojnë qytetarëve të Kosovës, lirinë e lëvizjes dhe një mjedis të sigurt pa marrë parasysh përkatësinë etnike, fenë apo vendin ku jetojnë.
“Prandaj, ne patrullojmë në të gjitha zonat dhe i qëndrojmë afër komuniteteve në veri të vendit”, ka deklaruar koloneli Maurizio Mele, komandant i Njësisë së Specializuar të KFOR-it.
“Në kryerjen e misionit të saj, NATO bashkëpunon me Shtetet e Bashkuara të Amerikës, Bashkimi Evropian dhe akterët e tjerë ndërkombëtarë, sipas situatës për të mbështetur zhvillimin e një Kosove të qëndrueshme dhe paqësore”, thuhet më tutje.
Ndryshe, marrëveshja e reciprocitetit me Serbinë për dokumentet për hyrje-dalje e 27 gushtit parasheh të mundësohet lëvizja e lirë përmes letërnjoftimeve ndërmjet Kosovës dhe Serbisë.