Policia e Kosovës ka njoftuar se të premten është arrestuar një person mashkull kosovar nga Istogu, pasi ka ngacmuar një vajzë të mitur në rrjete sociale.
Po ashtu, Policia ka bërë të ditur se dyshohet se gjatë bisedave me video, i dyshuari ka kryer veprën penale ‘keqpërdorim i fëmijëve në pornografi’.
Ndërsa, rastin e kishte raportuar babai i vajzës në fjalë, dhe policia ka filluar hetimet rreth zbardhjes së rastit.
“Pas raportimit të rastit, në Stacionin Policor në Fushë Kosovë, nga ankuesi mashkull kosovar se vajza e tij është ngacmuar përmes rrjeteve sociale nga një mashkull i panjohur, policia ka iniciuar rastin ‘ngacmim’ (31.08.2022) dhe ka filluar hetimet rreth zbardhjes së rastit”, thuhet në njoftimin e policisë.
Gjithashtu, rasti është trajtuar nga Drejtoria për Hetimin e Krimit të Organizuar, Sektori për Hetime të Krimeve Kibernetike.
“Hetuesit policorë pas veprimeve hetimore intensive kanë arritur të identifikojnë të dyshuarin L.G., (mashkull kosovar, nga një fshat i Istogut), i cili dyshohet se përmes rrjetit social ka kontaktuar me viktimën femër”, thuhet në njoftim.
Policia ka bërë të ditur se si provë materiale është konfiskuar një telefon celular.
Ndërkaq, pas intervistimit me aktvendim nga prokurori, i dyshuari është dërguar në ndalim policor.