Kryeministri i Kosovës, Albin Kurti, teksa e ka uruar kryeministren e re të Britanisë së Madhe, Lizz Truss për marrjen e detyrës, e ka ftuar, gjithashtu, për vizitë në Kosovë.
Kreu i qeverisë ka shprehur mirënjohjen e Kosovës për mbështetjen e Mbretërisë së Bashkuar në luftën çlirimtare kundër një regjimi gjenocidal.
“Ju na mbështetët në luftën tonë çlirimtare kundër një regjimi gjenocidal. Nuk do të harrojmë kurrë; dhe u jemi përgjithmonë mirënjohës. Qeveria jonë po punon shumë për t’i realizuar premtimet e saj për vende pune dhe drejtësi për qytetarët tanë, duke investuar në kapitalin njerëzor, duke mbyllur hendekun e aftësive përmes ringjalljes së cilësisë së arsimit tonë, dhe duke reformuar sistemin e drejtësisë”.
“Kryeministre, kam nderin të ju mirëpres në Kosovë në mundësinë e parë që është e përshtatshme për ju. Ju lutem, pranoni urimet e mia më të përzemërta dhe konsideratën time më të lartë ndërsa merrni këtë rol vendimtar në këto kohë sfiduese”, thuhet në letrën që Kurti ia ka dërguar Truss-it.
Ai shtoi se teksa vendi po përballet me pasojat e pandemisë Covid-19, krizën e energjisë dhe koston e rritur të jetesës, “së bashku me autoritarizmin në rritje dhe agresionin e paprovokuar të Rusisë kundër Ukrainës, ne presim me padurim udhëheqjen tuaj për ta ndihmuar Evropën dhe pjesën tjetër të botës të navigojnë nëpër këto kohë të vështira”.