Ukraina akuzoi ushtrinë ruse për sulmimin e infrastrukturës civile si përgjigje të një ofensive të shpejtë të fundjavës nga trupat ukrainase që e detyroi Rusinë të braktiste bastionin e saj kryesor në rajonin e Kharkiv.
Zyrtarët ukrainas thanë se objektivat e sulmeve hakmarrëse përfshinin objektet e ujit dhe një termocentral në Kharkiv, ku shkaktuan ndërprerje të gjerë të energjisë elektrike.
“Nuk ka objekte ushtarake, qëllimi është t’i privojnë njerëzit nga drita dhe nxehtësia,” shkroi presidenti ukrainas,Volodymyr Zelenskiy, në Twitter të dielën.
Moska ka mohuar që forcat e saj të kenë shënjestruar qëllimisht civilët.
Zelenskiy e ka përshkruar ofensivën e Ukrainës në verilindje si një përparim potencial në luftën gjashtëmujore. Ai tha se dimri mund të ketë përfitime të mëtejshme territoriale nëse Kievi merr armë më të fuqishme.
Në disfatën më të rëndë për forcat e Moskës qëkur u zmbrapsën nga periferia e kryeqytetit Kiev në mars, mijëra ushtarë rusë lanë pas municione dhe pajisje, ndërsa u larguan nga qyteti i Izium, të cilin e kishin përdorur si qendër logjistike.
Komandanti kryesor i Ukrainës, gjenerali Valeriy Zaluzhnyi, tha se forcat e armatosura kishin rifituar kontrollin e më shumë se 3,000 km katrorë (1,158 milje katrorë) që nga fillimi i këtij muaji.
Përfitimet e Ukrainës janë të rëndësishme politikisht për Zelenskiy, pasi ai kërkon të mbajë Evropën të bashkuar pas Ukrainës – duke furnizuar armë dhe para – edhe pse një krizë energjetike po afrohet këtë dimër pas shkurtimeve në furnizimet me gaz rus për klientët evropianë.