Pas sulmeve kibernetike që ndodhën në Shqipëri, sekretari i ShBA-së, Antony Blinken, ka telefonuar kryeministrin e Shqipërisë, Edi Rama.
Lajmin për bisedën mes Ramës dhe Blinken e ka konfirmuar zëdhënësi i Departamentit të Shtetit të ShBA-së, Ned Price. Price ka theksuar që sekretari Blinken ka dënuar sulmin e papërgjegjshëm kibernetik të 9 shtatorit kundër sistemeve të kontrollit kufitar të Shqipërisë.
Gjatë ditëve të fundit, Shqipëria ka njoftuar për sulmin e përsëritur kibernetik nga Irani.
Kryeministri i Shqipërisë, Edi Rama, ka njoftuar për sulmin kibernetik përmes një postimi në Twitter. Në postimin e tij njoftohet se në këtë sulm kibernetik është përfshirë sistemi TIMS.
Sulmi kibernetik i Iranit ndaj sistemit TIMS në Shqipëri ndodhi pa kaluar as 24 orë nga vendimi që mori SHBA-ja të premten, (09.09) për sanksione ndaj Ministrisë Iraniane të Zbulimit dhe Sigurisë si edhe ndaj titullarit të kësaj Ministrie, ministrit Esmail Khatibi.
Departamenti i Thesarit të ShBA-së ka njoftuar se sanksionet ndaj Iranit merren për përfshirje në aktivitete kibernetike kundër Shteteve të Bashkuara dhe aleatëve të tyre.
Në këtë njoftim tutje thuhet se në korrik të vitit 2022, aktorët e sulmeve kibernetike, me mbështetjen e qeverisë së Iranit dhe Ministrisë Iraniane të Zbulimit dhe Sigurisë, ndërprenë sistemet kompjuterike të qeverisë së Shqipërisë duke e detyruar qeverinë të pezullojë shërbimet publike online për qytetarët e saj.