Presidenti kinez, Xi Jinping, do të udhëtojë për një vizitë zyrtare në Azinë Qendrore, pas më shumë se dy vjet.
Qyteti Samarkand i Uzbekistanit do të jetë vendtakimi i presidentit të Rusisë, Vladimir Putin me të parin e Kinës.
Të dy liderët botërorë do të takohen në kuadër të Organizatës së Bashkëpunimit të Shangait.
Siç raporton BBC-ja, temë diskutimi gjatë takimit do të jetë lufta në Ukrainë dhe “tema të tjera ndërkombëtare dhe rajonale” në takimin e tyre më vonë këtë javë.
Të dy do të takohen në Uzbekistan në një samit që pritet të tregojë një “alternativë” ndaj botës perëndimore, thotë Kremlini.
Xi po bën udhëtimin e tij të parë jashtë shtetit që nga fillimi i pandemisë. Ai fillon udhëtimin e tij tre-ditor në Kazakistan të mërkurën.
Më pas ai do të takohet me Putin të enjten në Samitin e Organizatës së Bashkëpunimit të Shangait (SCO) në Samarkand, i cili do të zhvillohet nga 15-16 shtator.
Putin do të takohet gjithashtu me liderë të tjerë, përfshirë ata të Indisë, Pakistanit, Turqisë dhe Iranit – por takimi i tij me udhëheqësin e Kinës “është i një rëndësie të veçantë”, tha zëdhënësi i politikës së jashtme të Kremlinit, Yuri Ushakov.
Kina dhe Rusia kanë kërkuar prej kohësh të pozicionojnë SCO-në, të themeluar në vitin 2001 me katër ish-kombe të Azisë Qendrore sovjetike, si një alternativë ndaj grupeve shumëpalëshe perëndimore.
Ndërkohë, Xi u largua për herë të fundit nga Kina në janar të vitit 2020 për të vizituar Myanmarin – vetëm disa ditë para se të hynte në fuqi bllokimi i parë në Wuhan.
Kina nuk është pjesë e sanksioneve ndërkombëtare kundër Rusisë dhe tregtia mes dy vendeve ka vazhduar të rritet.
Importet indiane dhe kineze të naftës ruse janë rritur që nga pushtimi i Ukrainës.