Qindra iranianë të cilët jetojnë në Francë dhe aktivistë të të drejtave të njeriut janë mbledhur në Paris të shtunën e 24 shtatorit, për të protestuar kundër shtypjes së demonstratave të Iranit, të shkaktuara nga vdekja e 22-vjeçares Mahsa Amini, e arrestuar nga policia e moralit për “veshje të papërshtatshme”.
Protestuesit janë mbledhur në qendrën “Place du Chatelet” në kryeqytetin francez dhe kanë brohoritur kundër liderit iranian, Ayatollah Ali Khamenei.
Ata i kërkuan, gjithashtu, presidentit francez, Emmanuel Macron, që të ndërhyjë dhe të mbajë një qëndrim kundër veprimeve të Khameneit.
Të paktën 35 persona janë vrarë deri më tani në protestat e dhunshme, të cilat kanë hyrë në ditën e nëntë të protestave në mbarë Iranin. Qeveria iraniane nuk ka toleruar protesta të tilla, duke u përplasur me demonstruesit dhe duke shtypur aksesin në internet.
Amini ishte arrestuar më 13 shtator në Teheran për “veshje të papërshtatshme” nga policia e moralit, e ngarkuar me zbatimin e kodit të rreptë të veshjes së Republikës Islamike.
Ajo kishte vdekur tri ditë më vonë në spital, dhe vdekja e saj shkaktoi protesta gjatë natës në qytetet kryesore iraniane, përfshirë kryeqytetin Teheran, raporton euronews.
Ndryshe, policia e moralit, e njohur zyrtarisht si Guidance Patrol, gjithashtu i ndalon gratë të veshin pallto të shkurtra mbi gju, pantallona të ngushta dhe xhinse me vrima në to, dhe veshje me ngjyra të ndezura, ndër të tjera.