Shefi i mbrojtjes së Rusisë ka thënë se ushtria e vendit ka rekrutuar mbi 200,000 rezervistë si pjesë e një mobilizimi të pjesshëm të nisur dy javë më parë.
Ministri i Mbrojtjes Sergei Shoigu, tha të martën se rekrutët po i nënshtroheshin trajnimit në 80 poligone zjarri përpara se të dislokoheshin në vijën e frontit në Ukrainë, ku forcat ruse janë duke u tërhequr në disa zona, raporton AP.
Presidenti Vladimir Putin urdhëroi mobilizimin më 21 shtator për t’i dhënë mbështetje trupave të tij në Ukrainë.
Shoigu tha më parë se deri në 300,000 rezervistë do të thirreshin për shërbim, por urdhri i Putinit la të hapur mundësinë e një përpjekjeje edhe më të madhe rekrutimi. Disa media ruse kanë spekuluar se ushtria planifikon të thërrasë 1 milion rezervistë ose më shumë.
Mobilizimi nxiti protesta në shumë zona anembanë Rusisë dhe bëri që dhjetëra mijëra burra të largoheshin nga Rusia.