Pas mesditës, gjatë një vizite në Suharekë, kryeministri në detyrë, u pyet se kur do do t’ia propozojë mandatarin për kryeministër presidentes.
“Ato janë gjëra të Prishtinës, atje i diskutojmë ato. Këtu jemi për investimin 11 milionë euro për stadiumin e futbollit në Suharekë”, ka thënë Albin Kurti.
Partia fituese e zgjedhjeve dhe kryetari i Kuvendit, vlerësojnë se Kuvendi është funksional dhe janë hapur rrugët për formimin e Qeverisë.
Të paktën deri tani, ndryshe mendojnë, Presidentja, partitë tjera, një pjesë e madhe e shoqërisë civile, përfshirë edhe juristë.
Megjithatë, ka jurist, sikurse ish-hartuesja dhe anëtarja e Gjykatës Kushtetuese, Gjyljeta Mushkolaj, e cila mendon se puna e Kuvendit nuk duhet të bllokohet nga mungesa e nënkryetarit serb.
Mushkolaj vlerëson se sipas Kushtetutës, me zgjedhjen e kryeparlamentarit, i hapet rrugë afateve për formimin e Qeverisë, sepse kryesia e Kuvendit ka thjesht mandat administrativ, i cili thotë se përcaktohet me rregulloren e punës së Kuvendit.
“Unë nuk jam këshilltare e znj. Osmani, unë e konsideroj që bazuar në Kushtetutë, nëse Kushtetutën dojmë me e respektu. Kushtetuta jonë e konsideron që Kuvendit është konstituar në momentin kur të votohet kryetarit i Kuvendit dhe të largohet nga ulësja kryesuesi. Ky ulet dhe ky mandej si kryetar e udhëheqë zgjedhjen e kryesisë”, ka thënë Mushkolaj.
Ndryshe nga Mushkolaj, Instituti i Kosovës për Drejtësi, vlerëson se pa u zgjedhur 5 nënkryetarët, Kuvendi i Kosovës nuk është konstituar.
Hulumtuesi Gzim Shala, thotë se duhet të pritet vlerësimi i Gjykatës Kushtetuese pas ankesës së Listës Serbe, e më pas të ecet përpara, por duke u përsëritur i gjithë procesi i votimit të nënkryetarëve për komunitetet, i cili sipas tij, duhet të zhvillohet si pako.
“Për këtë arsye aktualisht, sipas Kushtetutës pa marr, parasysh konstatimeve të dhëna nga kryetari i Kuvendit, ne nuk kemi Kuvend të konstituar. Tash është shumë e rëndësishme është që të shohim se cili do të jetë qëndrimi i Presidentes së Republikës së Kosovës, nëse do të jetë mbrojtja e kushtetushmërisë sipas Kushtetutës së Kosovës, apo luejtja e lojës së një partie politike në rastin konrkret, të Lëvizjes Vetëvendosje”, ka thënë Shala
Gjykata Kushtetuese i ka 60 ditë afat për të dhënë interpretim për kërkesën e Listës Serbe. Krahas kësaj IKD, i bën thirrje Presidentes Osmani që të mos ia kërkojë Lëvizjes Vetëvendosje mandatarin për formimin e qeverisë, por t’i drejtohet edhe vetë ajo Gjykatës Kushtetuese, për ta sqaruar situatën.