“Vërtetë është problematike që t’ua shpjegojmë partnerëve tanë këtu në Uashington që targat e veturave janë më të rëndësishme sesa çështja e marrëveshjes finale” ka treguar Kryetari i Parisë Demokratike të Kosovës Memli Krasniqi për vështirësitë e tij gjatë vizitës në Uashington.
Krasniqi, ka theksuar krijimin e shtetit të Kosovës ka qenë falë mbështetjes amerikane, sipas tij, Qeveria e udhëhequr nga Albin Kurti, duhet ta kultivojë këtë miqësi.
“Jo vetëm të ekzistencës së shtetit të Kosovës, por sidomos në kohërat më të vështira të historisë tonë kombëtare, gjatë luftës në Kosovë, edhe projekti i çlirimit të Kosovës, edhe ai i pavarësimit dhe shtetëndërtimi i Kosovës ka ndodhur vetëm kur kemi pasur koordinim dhe përafrim të qëndrimeve tona me Shtetet e Bashkuara të Amerikës”, ka thënë për Zërin e Amerikës, transmeton Portali Dukagjini.
Ai është shprehur se askush nuk e konteston legjitimitetin e vendimit të Qeverisë së Kosovës për konvertimin e targave të paligjshme “KM” në ato të ligjshme RKS.
Por sipas tij, duhet të dëgjohet kërkesa e Shteteve të Bashkuara të Amerikës dhe Bashkimit Evropian për një “shtyrje disa mujore, konkretisht 10 mujore në mënyrë që t’i jepet mundësi avancimit të procesit të dialogut”.
“Sepse edhe njerëzit që e kanë përcjell Ballkanin Perëndimor dhe zhvillimet në Kosovë, kanë pritur që ne tash të jemi të përqendruar në arritjen e një marrëveshjeje finale, të përgjithshme dhe të zbatueshme, obligative ndërkombëtarësh ndërmjet Kosovës dhe Serbisë që do të përqendrohet nga njohja e ndërsjellë”.