Më 4 prill, çështja e dinarit serb do të jetë temë diskutimi në Bruksel.
Por se “a ka marrë kahje politike çështja e dinarit’, eksperti financiar, Milazim Abazi, ka thënë se çuditërisht është politizuar edhe nga faktori ndërkombëtar, por edhe nga faktorët e brendshëm.
“Që nga momentet e para është politizuar. Si një çështje ligjore dhe profesionale siç ishte rregullorja e BQK-së për pengimin dhe pastrimin të parave dhe financimit të terroizmit si dhe ekonomisë informale. Kjo çuditërisht u politizua jo vetëm nga faktori ndërkombëtar, por edhe nga brenda. Kjo ka qenë totalisht e panevojshme sepse rregullorja e BQK-së është në harmoni të plotë me marrëveshjen dhe stabilizim asocimit me BE-në”, është shprehur Abazi për emisionin ‘Five’ në Televizionin Dukagjini.
Abazi ka thënë se “Kosova s’mund të bëjë asnjë hap më tutje nëse se rregullon çështjen e pastrimit të parave. Kjo rregullore është në pajtimin e plotë me Planin e Rritjes në Samitin e Shkupit, që është bërë në janar të këtij viti, për qarkullimin e parasë në mënyrën e shpejtë dhe pa pengesa”.
Çështja e dinarit serb e cila është politizuar, eksperti financiar Abazi ka thënë se “ nuk e prek interesin e qytetarëve serbë në Kosovë, por prek interesat e Vuçiqit për financimin e terrorizmit dhe strukturave paralele. Si dhe pengon ekonominë informale”.
Në anën tjetër, Kadri Kryeziu, ish-gjyqtar i Kushtetueses, ka thënë se rregullorja e re e BQK-së ka pasur nevojë që të ketë një periudhë të implementimit pas vendimit.
“Kosova është duke u zhvilluar, duke u integruar në Evropë dhe mekanizma ndërkombëtarë. Vendimi i BQK-së është veprim ligjore dhe legale, në të cilën valuta e vetme në qarkullim do të jetë euro. Ata të cilët kanë përdorë dhe keqpërdorë valuta tjetër përmes një rregullore, e nga një institucion kushtetues si BQK-ja. Është dashtë një vendim i tillë, por të ketë hapësirë për implementim. Që nënkupton gjashtë muaj ditë do të vinte si implementimi i saj”, shtoi Kryeziu.