Deputeti i Kosovës, Haki Abazi, ka thënë se Serbia ka pranuar targat RKS, për të përfiuar financiarisht nga lëvizja e qytetarëve të Kosovës pas liberalizimit të vizave.
“Këtë vendim e ka bërë vetëm disa ditë para përfundimit të vitit. Pritjet e gjata disa orëshe në kufinjët me Serbinë janë kolonat e makinave që paguajnë taksë rrugore, furnizohen me derivate, blejnë nëpër markete, paguajnë haraç, dhe kërkojnë e paguajnë për shërbimet tjera derisa kalojnë nëpër Serbi. Përfituesi nga lëvizja me makina dhe autobus drejt shteteve evropiane nga liberalizimi i vizave është Serbia”, ka thënë Abazi.
Sipas tij, Serbia në çdo vendim ka kalkulimin e përfitimit financiar dhe të përfitimit nga xhepi i qytetarëve të Kosovës.
“Kjo mendësi e publicitetit të konfliktit dhe luftës në njerën anë e konfliktit të vazhdueshëm me njësitet elitë të policisë, është mendësi qeverisëse e friksimit të qytetarëve me qëllim të qeverisjes me manipulim dhe për defokusim nga problemet reale të qytetarëve!”, ka thënë ai.
Ndërsa, për deklaratën që Serbia e ka bërë pranimin e tabelave për të mos zbatuar marrëveshjen e Brukselit dhe aneksin, deputeti ka theksuar se është “manipulim i kryeministrit”.
“Vuçiq ka arritur ta mbajë Kosovës në kurth dhe njësoj por edhe me sanksione ndaj Kosovës ka arritur që t’ja vendos lakun në fyt me mbishkrimin e zajdnicës dhe tani po i mbledhë paratë e Kosovarëve në ikje për Perendim! Serbia po realizon procese të kalkuluara historike duke arritur zbrazjen e Luginës dhe vështërsimin e funksionalitetit të Kosovës, ndërsa ne merremi me deklarata kozmetike e postime për trimërinë e Sveçles!”.