Kryeministri i Malit të Zi, Dritan Abazoviq, teksa u ka kërkuar falje familjarëve të viktimave, në 27 vjetorin e gjenocidit në Srebrenicë, ai ka thënë se deklarata e tij ishte “e paqartë”.
Abazoviq ka potencuar se qëllimi i tij është paqja.
“U kërkoj falje nënave të Srebrenicës për mendimin e shprehur në mënyrë të paqartë. Dihet se çdo vepër varet nga qëllimi i saj. Qëllimi im është paqja. Gjenocidi i kryer kundër boshnjakëve në Srebrenicë të mos përsëritet ndaj askujt”, shkroi ai.
Oprostite @MSrebrenice na nejasno izrečenoj misli.
Poznato je da svako djelo zavisi od svog cilja. Moj cilj je mir.
Genocid počinjen nad Bošnjacima u Srebrenici da se nikad nikome ne ponovi.@SrebrenicaUK @SrebrenicaMC pic.twitter.com/VOcLvrcAmf— Dr Dritan Abazovic (@DritanAbazovic) July 11, 2022
Kjo kërkim-falje vjen pasi familjarët e viktimave të gjenocidit, shoqatat dhe përfaqësuesit e partive politike në Mal të Zi, kanë thënë se Abazoviq relativizoi gjenocidin në Srebrenicë.
“Gjenocidi nuk u krye kundër boshnjakëve, por kundër njerëzve, dhe nuk u krye nga ushtritë, por nga politikanët, politika e së keqes, politika e vdekjes dhe politika e mashtrimit”, ishte shprehur Abazoviq.
Premijer @DritanAbazovic da se izvini nama i svih žrtvama genocida u Srebrenici. Naša djeca su ubijena samo zato što su Bošnjaci, ubila ih je organizovana vojska. U Potočarima nema mjesta za relativizaciju zločina.
— Majke Srebrenice (@MSrebrenice) July 11, 2022
Pas kësaj deklarate, familjarët viktimave dhe shoqatat i kërkuan Abazoviqit që të kërkojë falje sepse definicioni i gjenocidit thotë se ai përbën “synimin për të shkatërruar plotësisht ose pjesërisht një grup kombëtar, etnik, racor apo fetar”.
Më herët gjatë 11 korrikut, shoqata “Nënat e Srebrenicës” ka thënë se Abazoviq duhet t’iu kërkojë falje të gjithë viktimave të gjenocidit në Srebrenicë.
“Fëmijët tanë u vranë vetëm sepse ishin boshnjakë, ata u vranë nga një ushtri e organizuar. Në Potoçari nuk ka vend për relativizim të krimit”.
Në 27-vjetorin e Masakrës në Srebrenicë, në Qendrën Përkujtimore në Potoçari u varrosën eshtrat e 50 viktimave të gjenocidit që janë identifikuar së voni.
Forcat serbe vranë mbi 8,000 burra dhe djem myslimanë gjatë luftës së viteve ’90.
Masakra është cilësuar si mizoria më e rëndë në Evropë që prej përfundimit të Luftës së Dytë Botërore, ndërsa Gjykata Ndërkombëtare e Hagës e ka njohur si gjenocid.