Kryetari i Lidhjes Demokratike të Kosovës(LDK), Lumir Abdixhiku, ka reaguar me rastin e 24-vjetorit të Masakrës së Reçakut.
“Mëngjesi i hershëm i 15 janarit të vitit 1999, mban një ndër aktet më të rënda, më të dhimbshme dhe më tronditëse të Serbisë ndaj popullit të Kosovës”, ka shkruar Abdixhiku.
I pari i LDK-së ka theksuar se ky akt ishte “aq tronditës”.
“Krim kundër njerëzimit do ta quante ambasadori Walker atëherë – saqë i njëjti u bë pikë kthese e vëmendjes së botës demokratike ndaj Kosovës dhe angazhimit tonë për jetë të lirë”, ka shtuar tutje kreu i LDK-së.
Abdixhiku ka theksuar se “teksa po largohemi pothuajse një çerekshekulli nga kjo ngjarje e errët e historisë njerëzore, ndjejmë gjithë afërsinë me dhimbjet e asaj dite të familjarëve e të mbijetuarve”.
“Ndjejmë dhe nevojën që këtë ditë të dhimbshme të kujtesës sonë, ta mbajmë sot e gjithherë si rikujtim që s’shuhet të sakrificës së madhe të popullit tonë për liri e shtetësi. Mbi këtë sakrificë, përbashkimi ynë për Kosovën, atdheun tonë, bëhet domosdoshmëri”, ka potencuar Abdixhiku.