Prokuroria Speciale e Kosovës ka bërë të ditur se ka ngritur aktakuzë ndaj shtatë personave për shkak të dyshimit të bazuar se në bashkëkryerje e kanë kryer veprën penale, Falsifikimi i rezultateve të votimit, në zgjedhjet e parakohshme të Përgjithshme Parlamentare për Kuvendin e Kosovës të mbajtura më datën 14 shkurt 2021.
Në njoftim bëhet e ditur se në mesin e të akuzuarve është edhe ish-deputeti i Aleancës për Ardhmërinë e Kosovës (AAK), me inicialet H.SH.
“Në mesin e të akuzuarve janë: H. Sh. ish-deputet i Kuvendit të Kosovës gjatë legjislaturës së vitit 2019 nga radhët e subjektit politik Aleanca për Ardhmërinë e Kosovës (AAK), të pandehurve S. M., A.K., I. H., G. H., dhe D. G. që të gjithë zyrtarë të Qendrës për Numërimin e Rezultateve të KQZ-së dhe të pandehurit P.P”, thuhet në njoftim.
“Hetimet kanë vërtetuar se të pandehurit, kundërligjshëm ia kanë shtuar 65 vota kandidates për deputete M. H. S. nga radhët e AAK-së, kurse kandidatit H. Sh. ia kanë shtuar 3 vota”.
Po ashtu, sipas Prokurorisë hetimet arritën të dëshmojnë përfshirjen e kandidatit H. Sh në kryerjen e veprës penale, mirëpo nuk arritën të sigurojnë prova të mjaftueshme për të vërtetuar dyshimin e bazuar se M. H. S. ishte e përfshirë në kryerjen e veprës penale.
Sipas njoftimit, kjo çështje penale tashmë i ka kaluar në kompetencë Departamentit Special të Gjykatës Themelore në Prishtinë për procedurë të mëtutjeshme.
Kujtojmë se, të enjten e 29 dhjetorit, Prokuroria ka ngritur aktakuzë ndaj tetë personave në lidhje me Zgjedhjet e Parakohshme të Përgjithshme Parlamentare për Kuvendin e Kosovës, të mbajtura më datë 14 shkurt 2021.
Në mesin e tyre është edhe një ish-deputet i LDK-së. Këta tetë persona akuzohen për keqpërdorim të votave të diasporës.