Si të pavërteta janë cilësuar lajmet lidhur me ndalimin e takimit me kryetarin e komunës së Leposaviqit nga KFOR-i nga ana e ministrit të Mjedisit, Planifikimit Hapësinor dhe Infrastrukturor, Liburn Aliu.
Me anë të një postimi në Facebook, Aliu ka thënë se ishte udhëzimi i Policisë së Kosovës që sugjeronte të mos vazhdonin tutje.
“Lajmet se KFOR-i, më ka ndaluar që ta takoj Kryetarin e Komunës së Leposaviqit, z. Lulzim Hetemi, janë të pavërteta. Përkundrazi, KFOR-i na kanë ofruar siguri, me një njësit të tyre që e kanë dërguar pikërisht për këtë qëllim. Në fakt, ka qenë udhëzimi i Policisë së Kosovës që mos të vazhdojmë më tutje, me qëllim që të shmangim tensionimin e situatës nga bandat kriminale që silleshin përreth”, ka deklaruar ai.
Ndër të tjera, gjersa falënderoi kryetarin Hetemi për qëndresën e tij, ministri Aliu ka thënë se lajme të tilla zhvlerësojnë punën e Policisë së Kosovës.
“Spekulimet e tilla, i’u shkojnë për shtati vetëm bandave që janë të instaluara aty, njëherit këto lajme të pavërteta po ashtu po e zhvlerësojnë punën e palodhshme dhe profesionale që Policia e Kosovës po e bën atje. E falënderoj Kryetarin Lulzim Hetemi, për qëndresën e tij shembullore për Republikë, rend e ligj”, ka thënë ai.