Ministri i Infrastrukturës, Liburn Aliu, ka njoftuar fillimin e ndërtimit të rrugës Prizren-Tetovë, teka ka bërë të ditur janë nënshkruar kontratat për këtë projekt.
Aliu ka shtuar se kontratat janë ndarë në tre lote të para: Lot 1, i cili ka një vlerë prej rreth 8 milionë euro, dhe Lot 3, me një vlerë prej 8,346,804.38 euro. Megjithatë, për Lotin 2, Aliu thekson se OSHP e ka kërkuar një rivlerësim të mëtejshëm.
“Sot janë nënshkruar kontratat për realizimin e Rrugës Prizren-Tetovë, me gjatësi prej 20.350km, përkitazi ndërtimin e Rrugës Prizren-Kufiri me Maqedoninë e Veriut (Tetovë), për Lot 1 në vlerë prej 7,999,999.00 euro, si dhe Lot 3 në vlerë prej 8,346,804.38 euro.
Kjo rrugë i lidhë dy autostrada ndërkombëtare të cilat kalojnë në të dy anët e maleve të Sharrit, dhe lidhja e këtyre dy rrugëve në pikën më të afërt mes tyre, përveç se i afron dy qytetet dhe dy shtetet tona, ajo mundëson edhe hapjen e një korridori të ri rrugor me ndikim ekonomik për të dyja vendet.
OSHP ka kthyer në rivlerësim Lotin 2”, ka shkruar Aliu në Facebook.