Presidentja e Kosovës, Vjosa Osmani të shtunën ka zhvilluar një takim të rëndësishëm me Alexander Kasanofin, i cili është emëruar si zëvendës-ndihmëssekretar i Shtetit në Shtetet e Bashkuara të Amerikës për Ballkanin Perëndimor.
Ky ishte takimi i parë i Osmani me Kasanofin që nga marrja e tij në këtë post në mes të korrikut.
Ambasada amerikane në Kosovë ka shprehur mirënjohje për presidenten Osmani, e cila sipas ambasadës, pati përkushtimin për të biseduar me ndihmëssekretarin e ri të ShBA-ve rreth aksionit në veri, ku u mbyllën pesë objekte të komunave paralele, aksion për të cilin ambasada tha se u mor “pa u konsultuar me bashkësinë ndërkombëtare”.
Ambasada thotë se “vlerësojmë përkushtimin e presidentes Osmani për një koordinim të tillë, i cili është thelbësor për avancimin e trajektores evropiane dhe euroatlantike të Kosovës dhe arritjen e stabilitetit rajonal, normalizimit dhe integrimit ekonomik”.
“Në Forumin GlobSec të Pragës sot ndihmëssekretari i ri i ShBA-ve Alexander Kasanof dhe presidentja Vjosa Osmani diskutuan për një sërë çështjesh kyçe, duke përfshirë veprimet e pakoordinuara të së premtes nga Qeveria e Kosovës dhe rëndësinë e konsultimit me bashkësinë ndërkombëtare. E vlerësojmë përkushtimin e Presidentit Osmani për një koordinim të tillë, i cili është thelbësor për avancimin e trajektores evropiane dhe euroatlantike të Kosovës dhe arritjen e stabilitetit rajonal, normalizimit dhe integrimit ekonomik. ShBA mbetet e përkushtuar ndaj një Kosove sovrane, multietnike e demokratike”, thuhet në njoftimin e ambasadës.
Osmani takon Kasanofin, flasin për zhvillimet në rajon dhe dialogun