Ambasada e Kosovës në Shkup, ka bërë një reagim për incidentin ndaj presidentes Vjosa Osmani, ku sigurimi i aeroportit të Shkupit ka tentuar që t’ia marrë telefonin e saj privat dhe ta shtyjnë.
Kjo ambasadë ka përgenjeshtruar disa lajme që kanë qarkulluar në portalet në Maqedoninë e Veriut se “kjo ambasadë është prononcuar në lidhje me rastin dhe se kinse ka konfirmuar se kjo është nota e parë dërguar autoriteteve”.
Në reagimin e ambasadës thuhet se informacioni i plasuar është i pasaktë edhe substancialisht duke kërkuar që ky rast “i paprecdentë dhe i paligjshëm” i autoriteteve maqedonase ndaj Osmanit të mos përdoret për politika të brendshme në Maqedoninë e Veriut.
“Informacioni i plasuar është i pasaktë edhe substancialisht. Ambasada bën thirrje që të mos keqpërdoret emri i saj dhe mos të shfrytëzohet incidenti i paprecedent dhe i paligjshëm ndaj Presidentës së Republikës së Kosovës për qëllime të politikës së brendshme në RMV”, thuhet në reagim.
Ambasada e Republikës së Kosovës në Shkup përgenjështron në termat më të fuqishëm lajmin në disa portale të RMV se është prononcuar lidhur me incidentin në Aeroportin e Shkupit dhe se kinse ka konfirmuar se kjo është nota e parë dërguar autoriteteve. pic.twitter.com/cHDUc0SFGH
— Kosovo in North Macedonia (@KosovoinSkopje) August 3, 2024
Ndryshe, të enjten, presidentes Vjosa Osman u tentua t’i merrej telefoni në Aeroportin Ndërkombëtar të Shkupit, derisa Presidenca ka thënë se pati tentim edhe të shtyhej fizikisht.
Për këtë, Ministria e Punëve të Jashtme dhe Diasporës i ka dërguar notë proteste Maqedonisë së Veriut, duke kërkuar sqarime dhe hetime për incidentin.