Ambasadorët e vendeve të Quint janë duke zhvilluar një takim me kryeministrin e Kosovës, Albin Kurti.
Në pamjet që ka siguruar Dukagjini, takimi mes ambasadorët të vendeve të Quint është duke u zhvilluar në Qeverinë e Kosovës.
Në këtë takim mes diplomatëve dhe kreut të ekzekutivit besohet se në fokus të diskutimit do të jenë zhvillimet e fundit institucionale.
Po ashtu, kujtojmë se mbrëmë në Kuvendit e Kosovës u mbajt një seancë e jashtëzakonshme vetëm pak orë para skadimit të afatit kushtetues për zgjedhjen e presidentit.
Procesi i votimit u ndërpre pasi nuk u arrit kuorumi i nevojshëm për vazhdimin e procedurës. Sipas rregullave kushtetuese, në dy raundet e para për zgjedhjen e presidentit kërkohen 80 vota, ndërsa në raundin e tretë nevojiten të paktën 61 vota.
Në seancën e së enjtes në sallë ishin të pranishëm 66 deputetë nga koalicioni qeverisës, ndërsa deputetët e opozitës nuk morën pjesë në votim.
Për shkak të mungesës së kuorumit kishte dështuar edhe një seancë e mëhershme, e cila ishte thirrur për shqyrtimin e amendamenteve kushtetuese të propozuara nga presidentja Vjosa Osmani, që synojnë zgjedhjen e presidentit drejtpërdrejt nga qytetarët.
Pas përfundimit të seancës së dytë, kryetarja e Kuvendit, Albulena Haxhiu, i është drejtuar Gjykatës Kushtetuese të Kosovës me kërkesë për pezullimin e afateve kushtetuese që lidhen me procesin e zgjedhjes së presidentit.