Të dy vëllezërit Andrew dhe Tristan Tate janë liruar nga masa e arrestit shtëpiak në Rumani dhe tani do të mund të lëvizin lirshëm në kryeqytetin e Bukureshtit, teksa janë në pritje të gjyqit për akuza të ndryshme, duke përfshirë dhunimin dhe trafikimin me njerëz.
Ata ishin arrestuar në mars dhe akuzuar në qershor, por të dy i hedhin poshtë këto akuzat.
Sipas vendimit të Gjykatës, Andrew duhet të raportojë në Polici sipas afateve të përcaktuara ose në rast të ndryshimit të adresës së tij.
Gjithashtu, të dy vëllezërit janë ndaluar të kontaktojnë dy ndihmëset rumune, të cilat po akuzohen për përfshirje në veprat penale të dyshuara të kryera nga vëllezërit.
Gjyqtari ka paralajmëruar se do të bëjë një vlerësim pas dy javësh për të verifikuar nëse vëllezërit po e respektojnë vendimin e lirimit të tyre, raporton BBC.
Ngjarjet e arrestimit të dy vëllezërve kanë të bëjnë me akuzat e krijimit të një grupi të organizuar kriminal në vitin 2021, që kryen trafikim me njerëz, jo vetëm në Rumani, por edhe në Shtetet e Bashkuara dhe Mbretërinë e Bashkuar.
Në padi janë përmendur shtatë viktima që pretendohet se janë rekrutuar nga vëllezërit Tate, duke iu premtuar dashuri dhe martesë.
Andrew Tate, një britaniko-amerikan, ka fituar vëmendje online për deklaratat e tij të kontrovershme në lidhje me përgjegjësinë e grave në rastet e sulmeve seksuale.