Kryetari i Preshevës, Shqiprim Arifi, ka bërë të ditur se këtë të enjte ka pranuar dënimin prej 55 mijë dinarë (rreth 500 euro), nga Gjykata për Kundërvajtje në Vranjë, lidhur me vendosjen e flamurit kombëtar në selinë e Alternativës për Ndryshim — dega Bujanoc, me rastin e festës së 28 nëntorit, Ditës së Flamurit.
Arifi ka theksuar se ky aktvendim është pjesë e kolazhit diskriminues dhe e shkeljeve të drejtave sistematike individuale, kolektive të shqiptarëve në Luginën e Preshevës.
“Gjykata në fjalë ka nxjerrur AKTVENDIM lidhur me vendosjen e flamurit kombëtar shqiptar në selinë e partisë tonë në Bujanoc, me ç’rast ky dënim përbëhet prej 5000 dinarëve ndaj mua si person përgjegjës në pozitën e kryetarit të partisë “Alternativa për Ndryshim”, ndërkaq 50.000 dinarë për subjektin politik që kam drejtuar deri në shkurt të këtij viti, kur është datuar edhe ky aktvendim”, ka shkruar Arifi në Facebook.
Ai, gjithashtu, ka theksuar se ndërsa Qeveria e Kosovës po përgatitet për themelimin e Asociacionit të komunave me shumicë serbe, shqiptarëve në Preshevë u mohohen të drejtat elementare njerëzore.