Prokuroria Speciale e Kosovës ka njoftuar se ka arrestuar një person të nacionalitetit serb me inicialet M.M., të mërkurën e 19 tetorit.
Prokuroria Speciale njofton se i pandehuri M.M., dyshohet si anëtar i grupit kriminal të organizuar, si dhe për pjesëmarrje aktive në kryerjen e veprave penale ‘’Pjesëmarrje ose organizimi i grupit kriminal të organizuar’’.
Në njoftimin e Prokurorisë Speciale njoftohet se i arrestuari dyshohet edhe për vrasjen e politikanit serb, Oliver Ivanoviq, së bashku me të akuzuarit e tjerë N.S., M.R., R.B dhe S.A.
“Po ashtu, i njëjti që nga fillimi i vitit 2019, ka qenë i paarritshëm për organet e ndjekjes, edhe pse ka pasur Urdhërarrest në fuqi, dhe më datë 19.10.2022, në orët e mbrëmjes është arrestuar nga Policia e Kosovës”, thuhet në njoftimin e Prokurorisë Speciale.
Ndaj të njëjtit do të vazhdohet me procedurat sipas Kodit të Procedurës Penale, ku brenda afateve ligjore do të bëhet edhe kërkesë për caktimin e masës së paraburgimit, në mënyrë që procedura penale të vazhdojë pa pengesa.