Policia e Kosovës të martën e 15 gushtit ka arrestuar edhe një person në Prizren për sulm ndaj gazetarit, Vullnet Krasniqi.
Arrestimin e tij e ka konfirmuar për Portalin Dukagjini, zëdhënësi i Policisë së Kosovës, Shaqir Bytyqi.
I dyshuari me urdhër të prokurorit është ndaluar për 48 orë.
“Po, dje me datë 15.08.2023, pas një pune hetimore, policia ka arritur që të identifikojë dhe të arrestojë edhe një të dyshuar lidhur me rastin e sulmit ndaj gazetarit. I dyshuari pas intervistimit në prani të avokatit mbrojtës, me urdhër të prokurorit është ndaluar për 48 orë”, ka thënë Bytyqi.
Ndryshe, më 11 gusht, ekipi i gazetës “Nacionale”, gazetari Vullnet Krasniqi dhe kameramani Arbër Latifi, janë sulmuar në protestën e organizuar kundër festivalit “DokuFest” në Prizren.
Ndërsa, lidhur me rastin, në po të njëjtën ditë u arrestua i dyshuari A.K dhe i njëjti u dërgua në mbajtje për 48 orë.
Kurse, më 14 gusht 2023, Gjykata Themelore në Prizren ka caktuar masën e paraburgimit në kohëzgjatje prej 30 ditësh, ndaj të dyshuarit A.K.