Të enjten e 5 majit, përmes një komunikate për media, Zyra për Komunikim Publik nga Prokuroria Themelore e Gjilanit ka njoftuar se Departamenti për Krime të Rënda, në bashkëpunim me Policinë e Kosovës-Gjilan, pas hetimeve disamujore, ka arrestuar një person zyrtar të Shërbimit të Gjendjes Civile.
Bëhet fjalë për të dyshuarin I.R, zyrtar i Shërbimit të Gjendjes Civile në fshatin Bresalc dhe në fshatin Verbicë e Zhegovcit, i cili thuhet se ka kryer veprën penale ‘Keqpërdorim i pozitës apo autoritetit zyrtar nga neni 414, paragrafi 1 i Kodit Penal të Republikës së Kosovës”.
Ai është dërguar në mbajtje për 48 orë.
I njëjti dyshohet se ka regjistruar disa persona në kundërshtim me Ligjin e Shtetësisë së Republikës së Kosovës dhe Udhëzimin Administrativ 18/2013, konkretisht, ka vepruar në kundërshtim me nenin 32 të Ligjit të Shtetësisë së Republikës së Kosovës dhe me nenin 9 paragrafi 4, dhe neni 11 paragrafi 2 te Udhëzimit Administrativ 18/2013, duke regjistruar persona të ndryshëm në Komunën e Novobërdës, e te cilët më pastaj kanë përfituar pensione bazë.
Policia e Kosovës njofton se janë duke vazhduar hetimet rreth rastit.