Policia e Kosovës ka njoftuar se gjatë ditës së enjte (12 shtator) është arrestuar një serb, me inicialet T.P., nën dyshimin se ka kryer veprën penale “krim i luftës kundër popullsisë civile”.
Në njoftim thuhet se i dyshuari gjatë kohës së luftës në Kosovë, rreth muajit mars të vitit 1999, në Komunën e Istogut ka kryer vepra të ndryshme penale, duke përfshirë plaçkitjen dhe shkatërrimin e pasurisë së popullsisë civile.
Arrestimi u bë nga hetuesit policorë nga Drejtoria për Hetimin e Krimeve të Luftës, në koordinim, bashkëpunim dhe me autorizim të prokurorit të Prokurorisë Speciale të Republikës së Kosovës.
“Sot më 12.09.2024, ka arrestuar të dyshuarin T.P., i nacionalitetit serb, për shkak të dyshimit se ka kryer veprën penale ‘krimi i luftës kundër popullsisë civile’, vepër kjo e sanksionuar me nenin 142 lidhur me nenin 22 të Ligjit Penal të Republikës Socialiste Federative të Jugosllavisë si ligj në fuqi në kohën e kryerjes së veprës penale. Me urdhër të prokurorit të çështje, i pandehuri gjendet nën masën e arrestit dhe ndalimit policor, për t’u dërguar tek Gjyqtari i Procedurës Paraprake, brenda afatit ligjor,” thuhet në komunikatë.