Paneli i planifikuar për sot(e premte) në Bruksel, ku kryetarja e Kuvendit të Serbisë, Ana Brnabiq, duhej të fliste në temën “Serbia: Një vend kandidat strategjik në një udhëkryq kritik”, është anuluar për arsye ende të panjohura.
Gazetarët e mediave ndërkombëtare, të regjistruar për të marrë pjesë në këtë aktivitet dhe për t’i drejtuar pyetje Brnabiq, u informuan nga organizatori – Qendra e Politikave Evropiane (EPC) – se paneli nuk do të mbahej për shkak të “rrethanave të paparashikuara”.
Organizatorët shprehën keqardhje, por nuk dhanë detaje shtesë.
Brnabiq pritej të ishte folësja e vetme e konferencës, ku do të diskutoheshin situata politike në Serbi, reformat, përafrimi me politikën e jashtme të BE-së dhe stabiliteti rajonal.
Megjithatë, sipas agjencisë serbe të lajmeve Tanjug, Brnabiq do të qëndrojë në Bruksel sonte ku do të takohet me presidenten e Parlamentit Evropian, Roberta Metzola, si dhe me Gert Jan Kopman, drejtor i përgjithshëm i DG NEAR.
Ajo do të zhvillojë një takim edhe me ish-ambasadorin e BE-së në Serbi, Emanuel Giofre, aktualisht zëvendësdrejtor për Evropën dhe Azinë Qendrore në Shërbimin Evropian për Veprim të Jashtëm.
Në një deklaratë për TV Pink, Brnabiq tha se vizita në Bruksel do të jetë e vështirë, por theksoi se objektivi kryesor është mbrojtja e interesave të Serbisë.
“Kam folur gjatë me presidentin Vuçiq, e dimë planin tonë dhe çfarë duam të arrijmë. Do të luftojmë për ta mbrojtur Serbinë dhe interesat tona kombëtare, duke promovuar atë që bën shumica e Serbisë – jo urrejtje, jo dhunë. Sigurisht që do të jenë takime të vështira, por ne do të jemi në ofensivë”, tha ajo.