Avokatja Marigona Gashi ka thënë se fëmijët janë ata që më së shumti e vuajnë divorcin e prindërve.
Gashi në emisionin më të ri “Rreth e Rrotull” në RTV Dukagjini, ka thënë se shkurorëzimet janë në rritje e sipër dhe se pjesa më e ndjeshme janë fëmijët, pasi janë të lidhur emocionalisht me prindërit.
“Pjesa më e ndjeshme janë fëmijët, ata e vuajnë më së shumti këtë pjesë, janë të lidhur emocionalisht me fëmijët, këtu ndikon pastaj se kush e merr rolin e kujdestarisë”, ka thënë Gashi.
Një ndër vështirësitë që ajo ka në procedurat e shkurorëzimeve në punën e saj në Gjykatë, ka thënë se është te pjesa e kontributeve të gruas.
“Vështirësitë që hasim gjatë rasteve në gjykata është realisht te kontributi i gruas, e cila nuk punon dhe nuk ka të ardhura mujore, ligji mbi familjen është një ligj i mirë që parasheh të gjitha format, kontributet. Vetëm te kjo pjesa te kontributet e femrave, të cilat nuk punojnë, është mashkulli, ai i cili insiston që pjesa e trashëgimisë të mos i takojë gruas e cila është kujdesur tërë atë kohë për fëmijët”, ka vijuar ajo.
Ndryshe, sipas Agjencisë të Statistikave të Kosovës, janë 417 çifte që janë ndarë në tremujorin e parë të këtij viti.